SIZITAKI MBICHI HIZI!, SIMBA WAMEMTEGA HANS POPPE KWENYE MTEGO, SASA HIVI WANAHANGAIKA KUMNASUA

SIMBA SC imefanya mkutano mkuu wa kawaida wa wanachama Agosti 3 mwaka huu katika ukumbi wa Bwalo la Maofisa wa Polisi, Osterbay, jijini Dar es salaam ambapo Agenda 13 zilijadiliwa.

Moja ya Agenda muhimu katika mkutano huo ilikuwa ile ya wanachama 72 waliosimamishwa uanachama akiwemo Michael Richard Wambura na mabadiliko ya katiba.

Kabla ya kufanya uchaguzi mkuu wa Simba juni 29 mwaka huu uliomuingiza madarakani Rais Evans Elieza Aveva, klabu hiyo ilifanya mabadiliko ya katiba yake.

Katika mabadiliko hayo kiliwekwa kipengele cha kumruhusu mtu aliyewahi kufungwa huko nyuma kupata nafasi ya kugombea. Watu wengi yawezekana hawafahamu siri iliyofichika katika mabadiliko  ya kipengele hiki.

Baadhi ya wanachama walioona umuhimu wa Zacharia Hans Poppe ambaye aliwahi kufungwa huko nyuma kwa makosa ya uhaini, waliweka kipengele kwamba mtu aliyefungwa agombee kwenye katiba ya Simba.

katika mkutano mkuu wa mabadiliko ya katiba, wanachama wakapitisha kipengele hicho, lakini ilipofika TFF kule, kile kipengele kikaminywa na hakikupitishwa.

Kwa utaratibu, Katiba inatakiwa TFF waipitishe, lakini ilipoenda kule wakabana kipengele hicho na hii ni kwasababu TFF kuna viongozi wa Simba ambao hawakutaka Hans Poppe apate nafasi ya kugombea.

Baadhi ya watu waliokuwa na nia ya kugombea nafasi za uongozi wa juu, hawakupendezewa na kipengele hicho kuwekwa ambacho kilikuwa kinamruhusu mwenyekiti wa kamati ya usajili wa klabu hiyo, Keptein wa zamani wa Jeshi la wananchi Tanzania, (JWTZ), Zacharia Hans Poppe kugombea.

Mkutano mkuu wa mabadiliko ya katiba ya Simba ulipitisha kipengele cha kuruhusu mtu aliyefungwa huko nyuma kugombea, lakini TFF waligoma kukupitsiaha

Hans Poppe ni mtu anayestahili kuwa kiongozi wa Simba kwasababu ana sifa zote. Ni mwanachama halisi, anajitolea kwa moyo wote kuisaidia klabu, yaani ana mapenzi ya dhati. Yupo tayari kuisaidia timu bila kunufaika na chochote.

Yeye ni tofauti na wale ambao wanajihusisha na timu ili waweze kufanya biashara zao. Hans Poppe hahitaji kufanya biashara na Simba zaidi ya kujitolea na kuisaidia timu kutokana na mapenzi ya dhati aliyokuwa nayo.

Kilichonikera mimi, ni kitendo cha wanachama hao hao wa Simba na baadhi ya watu ambao ni mahiri kabisa kujifanya wanaipenda Simba, lakini kumbe hawaitakii Simba mema na wapo kwa ajili ya kupata umaarufu au manufaa mengine kwa kutumia fursa ya kuwepo klabuni hapo.

Ule mkutano mkuu wa katiba ulipitisha kipengele cha kumruhusu Hans Poppe aweze kugombea, lakini kuna watu TFF wakaamua kuweka zengwe na kugoma kupitisha.

Zacharia Hans Poppe ana sifa zote za kuwa kiongozi wa Simba sc

Nimesema awali kuwa kule TFF kuna viongozi wa Simba ambao walikuwa na nia ya kugombea Urais, kwahiyo wakabana kupitisha kipengele cha kumruhusu Hans Poppe kwasababu waliona atakuwa ni kikwazo kwao.

Wakaenda mbali zaidi na kuweka kipengele katika katiba ya Simba kuwa hata wale wajumbe watano watakaoteuliwa na Rais, lazima wawe na sifa kama zile za wajumbe waliochaguliwa na wanachama.

 Uchaguzi ukafanyika na Hans Poppe akatolewa. Lakini Hans Poppe huyo huyo pamoja na kufanyiwa hizo hila, alionesha kuwa yeye ni mwanachama halisi na mpenzi wa Simba na alitoa milioni 20 kwa ajili ya kuendesha mkutano  mkuu wa uchaguzi wa Simba.

Ule mkutano mkuu wa Simba usingefanyika kama Hans Poppe asingetoa hela hizo.  Aliyafanya haya wakati tayari alishawekewe mizengwe na angekuwa mtu mwingine, angesusa na kuondoka zake, lakini alisaidia uchaguzi ufanyike.

Unafiki wa viongozi wa mpira wa Tanzania, uongozi uliokuwepo madarakani chini ya mwenyekiti wake, Ismail Aden Rage,  kwenye mkutano ule wa uchaguzi ulisema kwamba umeacha hela kwenye akaunti na hauna madeni, lakini kiuhalisia uongozi huo ulikuwa unadaiwa na Hans Poppe zaidi ya milioni 250 na mpaka sasa hajaidai klabu.

Hizi ni pesa ambazo alikuwa akizitoa kwa ajili ya kusaidia masuala ya usajili kwasababu yeye alikuwa mwenyekiti wa kamati hiyo na zingine ilikuwa ni kwa ajili ya kuendesha shughuli za kila siku za klabu.

Kabla ya uchaguzi, vilitengenezwa vipengele vya kumruhusu Hans Poppe kugombea na katiba ilipofika TFF wakaminya, lakini baada ya malengo yao kufanikiwa kwa kumuwekea vigingi, sasa wanaona aibu na kuitisha mkutano mkuu wa wanachama ili kufanya mabadiliko ya katiba, ikiwa ni siku chache tu baada ya kuingia madarakani.

Zacharia Hans Poppe (wa kwanza kulia) alikuwepo katika uongozi uliomaliza muda wake chini ya mwenyekiti Ismail Aden Rage.

Huo mkutano ulikuwa ni kubadili kipengele kimoja tu ili kuweza kumsafisha Hans Poppe aweze kuwa na sifa ya kuteuliwa kwenye kamati ya utendaji.

Kwahiyo kile kipengele kilichowekwa kwa ajili ya kumruhusu na kikaminywa,  ndio kile kile kikasababisha uitishwe mkutano mkuu ili kirekebishwe na kumpa Rais mamlaka ya kuteua wajumbe wa kamati ya utendaji pasipo kuzingatia sifa za hapo awali.

Kipengele kinabadilishwa na wale wanaohitaji ‘mahela’ ya Hans Poppe ili awasajilie wachezaji, lakini anarudije wakati amewekewa kipengele cha kumzuia?

Hapo ndipo mkutano wa wanachama uliitishwa ili kutegua ule mtego tena. Wanahangaika kutegua mtego ili Hans Poppe awe huru na kuweza kuingia kamati ya utendaji.

Simba hao hao wakiwa kule TFF walimuweka kwenye mtego wa Panya, na sasa wanahangaika kuutegua ili aweze kutoka. Simba walidhani Hans Poppe ni panya, lakini wamekuja kugundua sio panya.

Zacharia Hans Poppe akiwa ofisini kwake

Mimi binafsi namkubali Hans Poppe, bila mizengwe, chuki wala fitina, na naamini ana sifa za kuwa kiongozi wa Simba

ni aina ya watu wanaostahili kuiongoza Simba, lakini kuna watu wengine ambao hawahitaji kuona maslahi ya Simba na wanamuona yeye kama kikwazo.

Wanahangaika kumrejesha, kwahiyo wanang`ata huku na kupuliza. Huu ni unafiki usiotakiwa kuwepo na wakubali kuwa Hans Poppe anastahili kuwepo Simba na wasiweke mizengwe, wabadili kabisa katiba na kumfanya siku za usoni awe Rais wa timu kwasababu ana uwezo.

Isije ikafika muda wa uchaguzi, wakaitisha tena mkutano wa kufanya mabadiliko ya katiba ili Hans Poppe asigombee.

Halafu kuna kipengele kingine cha nafasi ya wazee wa klabu. Katiba ya Simba inasema, lazima mmoja wa wazee wa klabu aingie katika kamati ya utendaji, lakini wazee wote wa Simba waliopo, yawezekana hawana sifa kama zile za wagombea.

Kwahiyo wanatoa kipengele hicho ili kuruhusu mmoja wa wazee kuingia kwenye kamati ya utendaji.

Ina maana hao wazee wa Simba ambao hawana sifa wamezaliwa wao tu na hakuna nafasi ya kutafuta wazee wengine ambao wana sifa kama za wagombea?

Ina maana wazee wote wanaoipenda Simba hawajamaliza kidato cha nne? Yaani wazee wote duniani ambao wamejitolea kwa ajili ya Simba hawana vyeti vya kidato cha nne?

Au kwanini wasifanye mabadiliko ya katiba kama wanagundua kuwa wazee hawana sifa zile za wagombea ili iwe kwamba, sio lazima kwenye kamati ya utendaji awepo mzee.

Kiukweli hakuna mashiko kwa kipengele hiki cha wazee. Hapa ni kujaribu kuficha ukweli, sababu ya mabadiliko ya katiba itabaki kuwe ile ile ya kutafuta namna ya kumuingiza kwenye mfumo Hans Poppe.

Binafsi bila kumung`unya maneno, Zacharia Hans Poppe ana kila sifa ya kuwa kiongozi ndani ya klabu ya  Simba.

Umefika  muda sasa wa Unafiki, mizengwe, uzandiki kupigwa vita na kukemewa michezoni kama kweli tuna nia ya dhati ya kuendelea kufanya vizuri katika mashindano mbalimbali.

Moja kati ya sababu kubwa inayokwamisha sola la Tanzania kuendelea ni unafiki na uzandiki uliojaa kwa viongozi wa nchi hii.