LUIS SUAREZ ATUZWA BUTI YA DHAHABU NA KENNY DALGLISH!! APANIA , EL CLASICO!!

Luis Suarez ametunukiwa Buti ya Dhahabu na Bosi wake wa zamani huko Liverpool Kenny Dalglish na hapo hapo kuthibitisha yuko tayari kwa El Clasico huko Spain kwenye mtanange kati ya Barcelona na Real Madrid.
Suarez alitwaa Tuzo hiyo kwa kufunga Bao nyingi za Ligi Barani Ulaya, alipofunga Bao 31 kwenye Ligi Kuu England alipokuwa na Liverpool Msimu uliopita zikiwa ni idadi sawa na zile alizofunga Cristiano Ronaldo akiwa na Real Madrid kwenye La Liga.
Msimu huu, Luis Suarez amehamia Barcelona na hivi sasa anaelekea ukingoni kumaliza Kifingo chake cha Miezi Minne alichopewa na FIFA kwa kumng’ata Meno Beki wa Italy Giorgio Chiellini huko Brazil kwenye Fainali za Kombe la Dunia Mwezi Juni.
Kifungo cha Suarez kinamalizika baada ya Siku 10 na anaweza kucheza Mechi yake ya kwanza kwa Barcelona kwenye La Liga watakapoivaa Real Madrid hapo Oktoba 26, Mechi inayobatizwa Jina la El Clasico.
Alipoulizwa kama yuko tayari kuivaa Real, Suarez alijibu: “Ungeniuliza Wiki moja nyuma ningekuwa na wasiwasi lakini baada ya kuichezea Uruguay Mechi mbili Wiki hii nipo fiti. Nipo tayari kucheza na Real!”